മാധ്യമം മാവേലിക്കര ലേഖകനും കറ്റാനം മീഡിയാ സെന്റര് സെക്രട്ടറിയുമായ സുധീര് കട്ടച്ചിറയ്ക്കാണ് (45) കമ്പിവടികൊണ്ടുള്ള അടിയേറ്റ് ഗുരുതരമായി പരിക്കേറ്റത്.
ബുധനാഴ്ച രാത്രി 11 മണിയോടെയായിരുന്നു സംഭവം. സാരമായി പരിക്കേറ്റ സുധീറിനെ കായംകുളം ഗവ.ആശുപത്രിയില് പ്രവേശിപ്പിച്ചു. വീടിന് മുന്നിലേക്ക് അതിക്രമിച്ച് കയറിയ രണ്ടംഗസംഘമാണ് മര്ദിച്ചതെന്ന് സുധീര് പോലിസിന് മൊഴി നല്കി.
കട്ടച്ചിറ കൈലാസം വീടിന് മുന്നിലെത്തിയ സംഘം ഗേറ്റിനരികിലേക്ക് വിളിച്ചുവരുത്തിയാണ് തലയ്ക്ക് അടിച്ചത്. അപ്രതീക്ഷിതമായിട്ടായിരുന്നു ആക്രമണം. ഒഴിഞ്ഞുമാറിയതിനാലാണ് കൂടുതല് ആക്രമത്തില്നിന്ന് രക്ഷപ്പെട്ടത്.
മാവേലിക്കര എസ്എന്ഡിപി യൂനിയനുമായി ബന്ധപ്പെട്ട് കഴിഞ്ഞദിവസങ്ങളിലുണ്ടായ സംഭവങ്ങള് സംബന്ധിച്ച വാര്ത്തകളാണ് ആക്രമണത്തിന് പിന്നിലെ പ്രധാന കാരണമെന്ന് സംശയിക്കുന്നു. അബ്കാരി ബന്ധമുള്ള പ്രതികള്ക്കെതിരെയുള്ള കേസുകളില് പോലിസ് അലംഭാവം കാട്ടുന്നതായും ആരോപണമുണ്ട്. ഇതുസംബന്ധിച്ച വാര്ത്തകളും ആക്രമണത്തിന് കാരണമായി.
നിലംനികത്തല് വിഷയത്തില് നടപടിക്ക് തുനിഞ്ഞ വില്ലേജ് ഓഫിസറെ ഓഫിസില് കയറി അധിക്ഷേപിച്ച വിഷയത്തില് പ്രതികളിലൊരാള്ക്കെതിരേ കേസ് നിലവിലുണ്ട്.
സുധീര് കട്ടച്ചിറയെ ആക്രമിച്ച് ഗുരുതരമായി പരിക്കേല്പ്പിച്ച പ്രതികളെ ഉടന് പിടികൂടണമെന്ന് കെജെയു ജില്ല പ്രസിഡന്റ് വി പ്രതാപ്, സെക്രട്ടറി വാഹിദ് കറ്റാനം എന്നിവര് ആവശ്യപ്പെട്ടു. സംഭവത്തില് കറ്റാനം മീഡിയ സെന്റര് പ്രതിഷേധിച്ചു. പ്രസിഡന്റ് അജികുമാര് അധ്യക്ഷത വഹിച്ചു.
0 Comments