അതേസമയം നാലു ദിവസം മുൻപ് കടലില്‍ താനൂര്‍ ഭാഗത്ത് നിന്നും കണ്ടെത്തിയ മൃതദേഹം ഉബൈദിൻ്റേതാണെന്ന് ബന്ധുക്കള്‍ സ്ഥിരീകരിച്ചതിൻ്റെ അടിസ്ഥാനത്തില്‍ താനൂരില്‍ ഖബറടക്കിയിരുന്നു. ഇത് പൊന്നാനിയില്‍ വള്ളം മറിഞ്ഞ് കാണാതായ പൊന്നാനി മുക്കാടി സ്വദേശി കബീറിൻ്റെ മൃതദേഹമാണെന്ന് ആരോപിച്ച് കബീറിൻ്റെ ബന്ധുക്കളും രംഗത്തെത്തിയിരുന്നു.
ഖബറടക്കിയ മൃതദേഹം പുറത്തെടുത്ത് ഡിഎന്‍എ പരിശോധന നടത്താനുള്ള തീരുമാനത്തിനിടെയാണ് ഉബൈദിൻ്റേതെന്ന് ബന്ധുക്കള്‍ ഉറപ്പിച്ചു പറയുന്ന മൃതദേഹം തിങ്കളാഴ്ച മഞ്ചേശ്വരത്ത് നിന്നും കണ്ടെത്തിയത്. തീരദേശ പോലീസും, ബന്ധുക്കളും കാസര്‍കോട് എത്തിയാണ് ഉബൈദിൻ്റെ മൃതദേഹമാണെന്ന് സ്ഥിരീകരിച്ചത്. എന്നാല്‍ ആദ്യം ലഭിച്ച മൃതദേഹത്തെച്ചൊല്ലി തര്‍ക്കം നിലനില്‍ക്കുന്നതിനാല്‍ രണ്ട് മൃതദേഹങ്ങളും ഡിഎന്‍എ പരിശോധന നടത്തിയതിന് ശേഷമേ ബന്ധുക്കള്‍ക്ക് വിട്ടു നല്‍കുകയുള്ളൂ.
സെപ്റ്റംബര്‍ ആറിന് ഉച്ചയോടെയാണ് അഞ്ചംഗ സംഘം ഒട്ടും പുറം അഴിമുഖത്ത് നിന്നും ചെറുവള്ളത്തില്‍ മത്സ്യബന്ധനത്തിന് പുറപ്പെട്ടത്. രാത്രിയോടെയാണ് തോണി അപകടത്തില്‍ പെട്ടത്. മൂന്ന് പേരെ പരപ്പനങ്ങാടി ഹാബര്‍ പരിസരത്ത് നിന്നും മത്സ്യതൊഴിലാളികള്‍ രക്ഷപ്പെടുത്തി കരക്കെത്തിച്ചിരുന്നു.
കോര്‍മ്മാന്‍ കടപ്പുറം വെളിച്ചൻ്റെ പുരക്കല്‍ സൈതലവി, ഉന്മയത്തിന്റെ പുരക്കല്‍ മുഹമ്മദ് അബ്ദുല്‍ ഖാദര്‍, ഫാറൂഖ് പള്ളി ആണ്ടിക്കടവത്ത് ഉമ്മര്‍ എന്നിവരാണ് രക്ഷപ്പെട്ടത്.
ഫാത്തിമയാണ് ഉബൈദിൻ്റെ ഭാര്യ. മക്കള്‍: മുസ്തഫ, ഉദൈഫ. പൊന്നാനിയില്‍ വള്ളം മറിഞ്ഞാണ് കബീറിനെയാണ് കാണാതായത്. നാലുപേരുമായി പോയ നൂറില്‍ഹൂദ എന്ന വള്ളമാണ് ഞായറാഴ്ച അപകടത്തില്‍പ്പെട്ടത്. വള്ളത്തിലുണ്ടായിരുന്ന മൂന്ന് പേര്‍ പടിഞ്ഞാറക്കര നായര്‍തോട് ഭാഗത്തേക്ക് നീന്തിക്കയറുകയായിരുന്നു. ഇതിലുണ്ടായിരുന്ന പൊന്നാനി സ്വദേശി കബീറിൻ്റെ മൃതദേഹമാണ് ആദ്യം ലഭിച്ചതെന്നാണ് വിവരം.
അനീഷയാണ് കബീറിന്റെ ഭാര്യ. മക്കള്‍: റിനീഷ, സല്‍വില്‍, നിഹാല്‍.
0 Comments