ഇപ്പോഴിതാ, ആപ്പിള്‍ വാച്ചും ഇതേ രീതിയില്‍ ദുരുപയോഗം ചെയ്തിരിക്കുകയാണ് യുഎസ് ടെന്നീസിയിലുള്ള നാഷ് വില്‍ സ്വദേശി. തന്റെ ആപ്പിള്‍ വാച്ച് കാമുകിയുടെ കാറില്‍വെച്ച് ലൈവ് ആയി അവരുടെ ലൊക്കേഷന്‍ പിന്തുടര്‍ന്നതിന് ഇയാള്‍ അറസ്റ്റിലായി. കാറിന്റെ ചക്രത്തിലാണ് ഇയാള്‍ വാച്ച് കെട്ടിവെച്ചത്. ശേഷം ഒരു തേഡ് പാര്‍ട്ടി ട്രാക്കിങ് ആപ്പ് ഉപയോഗിച്ച് കാറിനെ പിന്തുടരുകയായിരുന്നു.
വാഹനത്തില്‍ ഇലക്ട്രോണിക് ട്രാക്കിങ് ഉപകരണം ഘടിപ്പിച്ചതിന് 29-കാരനായ ലോറന്‍സ് വെല്‍ച്ചിനെതിരെ കുറ്റം ചുമത്തിയതായി സത്യവാങ്മൂലത്തില്‍ പറയുന്നു.
കാമുകിയ്ക്ക് നേരെ ഇയാള്‍ പല തവണ വധഭീഷണി മുഴക്കിയിരുന്നു. ഇതേ തുടര്‍ന്ന് ഇവര്‍ക്ക് സംരക്ഷണം ഏര്‍പ്പെടുത്തിയിരുന്നു. കുറച്ചുകാലമായി താന്‍ ഫാമിലി സേഫ്റ്റി സെന്റര്‍ സന്ദര്‍ശിച്ചിരുന്നതായി ഇര പറഞ്ഞു. ഇവരെ പിന്തുടര്‍ന്ന് ലോറന്‍സ് ഈ സേഫ്റ്റി സെന്ററില്‍ എത്തുകയും തുടര്‍ന്ന് അവിടുത്തെ സുരക്ഷാ ഉദ്യോഗസ്ഥന്‍ പോലീസിനെ വിവരം അറിയിക്കുകയും ചെയ്യുകയായിരുന്നു.
ലൈഫ് 360 എന്ന ആപ്പ് ഉപയോഗിച്ചാണ് വെല്‍ച്ച് കാമുകിയെ പിന്തുടര്‍ന്നത്. ഇതേ ആപ്പ് ഉപയോഗിച്ച് താനും കാമുകനും പരസ്പരം നിരീക്ഷിക്കാറുണ്ടായിരുന്നുവെന്ന് ഇര പോലീസിനോട് പറഞ്ഞു. എന്നാല്‍ ഫാമിലി സേഫ്റ്റി സെന്റര്‍ സന്ദര്‍ശിക്കുമ്പോഴെല്ലാം അവര്‍ തന്റെ ലൊക്കേഷന്‍ ഓഫ് ചെയ്തുവെച്ചു. ഈ സമയങ്ങളിലെല്ലാം ലോക്കേഷന്‍ അയക്കാനും ഫോണ്‍ വിളിക്കാനും ആവശ്യപ്പെട്ട് കാമുകന്‍ നിരവധി സന്ദേശങ്ങള്‍ അയക്കാറുണ്ടായിരുന്നു.
ഫാമിലി സേഫ്റ്റി സെന്ററിലെത്തിയ പോലീസ് കണ്ടത് കാറിന്റെ ഒരു ടയറിനരികെ ഇയാള്‍ പതുങ്ങുന്നതാണ്. സംശയം തോന്നിയ പോലീസ് വന്ന് പരിശോധിച്ചപ്പോഴാണ് ടയറിനുമേല്‍ ആപ്പിള്‍ വാച്ച് ഘടിപ്പിച്ചതായി കണ്ടെത്തിയത്. വാച്ച് തന്റേതാണെന്ന് വെല്‍ച്ച് സമ്മതിച്ചു. കാമുകി ലൊക്കേഷന്‍ ഓഫ് ചെയ്യുമ്പോള്‍ തന്റെ ആപ്പിള്‍ വാച്ച് ഉപയോഗിച്ച് പിന്തുടരുകയായിരുന്നു ഇയാള്‍.
0 Comments