'രണ്ട് പേരെയും വേണം', കാമുകിമാരെ ഒരുമിച്ച് ഒരേ വേദിയിൽ വിവാഹം ചെയ്ത് യുവാവ്, സാക്ഷിയായി കുട്ടി

റാഞ്ചി: ഒരേ വേദിയിൽ വച്ച് രണ്ട് കാമുകിമാരെയും ഒരുമിച്ച് വിവാഹം കഴിച്ച് യുവാവ്. ജാർഖണ്ഡിലെ ലോഹർദാഗയിലെ ഒരു ഗ്രാമത്തിലാണ് അപൂർവ്വമായ ഈ സംഭവം. മൂന്ന് പേരുടെയും സമ്മതപ്രകാരമായിരുന്നു അസാധാരണമായ ഈ വിവാഹം. കുസും ലക്രയും സ്വാതി കുമാരിയും വരൻ സന്ദീപ് ഒറോണിനെ സ്നേഹിക്കുകയും വിവാഹം കഴിക്കണമെന്ന് ആവശ്യപ്പെടുകയും ചെയ്തതോടെയാണ് മൂന്ന് പേരുടെയും സമ്മതത്തോടെ ഒരേ സമയം വിവാഹം നടന്നത്.[www.malabarflash.com]

മൂന്ന് വർഷമായി സന്ദീപും കുസുമും ലിവ്-ഇൻ ബന്ധത്തിലായിരുന്നു. ഇരുവർക്കും ഒരു കുട്ടിയും ഉണ്ട്. ഒരു വർഷം മുമ്പ് സന്ദീപ് പശ്ചിമ ബംഗാളിലെ ഒരു ഇഷ്ടിക ചൂളയിൽ ജോലിക്ക് പോയതോടെയാണ് ഇവരുടെ പ്രണയകഥയിൽ വഴിത്തിരിവായത്. അവിടെ വച്ചാണ് ജോലിക്ക് വന്ന സ്വാതി കുമാരിയെ സന്ദീപ് പരിചയപ്പെടുന്നത്. വീട്ടിൽ തിരിച്ചെത്തിയ ശേഷവും ഇരുവരും ഈ ബന്ധം തുടർന്നു.

ഒടുവിൽ വീട്ടുകാരും നാട്ടുകാരും ഇവരുടെ ബന്ധം അറിഞ്ഞ് എതിർത്തു തുടങ്ങി. നിരവധി വഴക്കുകൾക്ക് ശേഷം, ഗ്രാമവാസികൾ ഒരു പഞ്ചായത്ത് വിളിക്കുകയും സന്ദീപ് രണ്ട് സ്ത്രീകളെയും വിവാഹം കഴിക്കാൻ തീരുമാനിക്കുകയും ചെയ്തു. സ്ത്രീകളോ അവരുടെ വീട്ടുകാരോ ഈ ഇരട്ട വിവാഹത്തെ എതിർത്തുമില്ല. 

അതേസമയം, "രണ്ട് സ്ത്രീകളെ ഒരുമിച്ച് വിവാഹം കഴിക്കുന്നതിൽ നിയമപരമായ പ്രശ്‌നമുണ്ടാകാം, പക്ഷേ ഞാൻ ഇരുവരെയും സ്നേഹിക്കുന്നു, ഇരുവരെയും ഉപേക്ഷിക്കാൻ എനിക്ക് കഴിയില്ല" എന്ന് വിവാഹത്തിന് ശേഷം സന്ദീപ് ഇന്ത്യ ടുഡേയോട് പറഞ്ഞു.