ലൈസൻസില്ലാതെ ഷവർമ്മ വിറ്റാൽ 5 ലക്ഷം രൂപ പിഴയും ആ​റ് മാസം തടവും; ചിക്കൻ 15 മിനിട്ടും ബീഫ് 30 മിനിട്ടും തുടർച്ചയായി വേവിക്കണം

തിരുവനന്തപുരം: ലൈസൻസ് ഇല്ലാതെ ഷവർമ്മ വിറ്റാൽ അഞ്ച് ലക്ഷം രൂപ ഈടാക്കാനും ആറ് മാസം തടവ് ശിക്ഷ നൽകാനും സർക്കാർ മാർ​ഗ നിർദേശം. നിർദേശത്തിന്റെ ഭാ​ഗമായി വൃത്തിഹീനമായ സാഹചര്യത്തിൽ ഷവർമ്മ ഉണ്ടാക്കുന്നതും വിൽപനയും നിയന്ത്രിക്കും.[www.malabarflash.com] 

ഷവർമ്മയിലൂടെ ഭക്ഷ്യവിഷബാധ വ്യാപകമായ സാഹചര്യത്തിലാണ് സർക്കാർ നീക്കം. ഇനിമുതൽ ഷവർമ്മ പാക്കറ്റുകളിൽ ഉണ്ടാക്കിയ തീയതിയും സമയവും രേഖപ്പെടുത്തണം, ഒരു മണിക്കൂറിന് ശേഷം ഉപയോ​ഗിക്കുന്നത് ഒഴിവാക്കണമെന്ന് രേഖപ്പെടുത്തണമെന്നും സർക്കാർ നിർദേശത്തിൽ പറയുന്നു. 

ഷവർമ്മ നിർമ്മിക്കുന്നതിന് ഉപയോ​ഗിക്കുന്ന സ്റ്റാൻഡ് വൃത്തിയുളളതും പൊടിപിടിക്കാത്തതും ആയിരിക്കണം. ഇറച്ചി മുറിക്കാൻ വൃത്തിയുളള കത്തികൾ ഉപയോ​ഗിക്കണം, ഭക്ഷണമുണ്ടാക്കുന്നവർ ഹെയർ ക്യാപും ​ഗ്ലൗസും ഉപയോ​ഗിക്കണം, തൊഴിലാളികളുടെ ഫിറ്റനസ് സർട്ടിഫിക്കറ്റ് ഉടമ ഉറപ്പാക്കണമെന്നും നിർദേശത്തിൽ പറയുന്നുണ്ട്.

ഷവർമ്മ നിർമ്മാണത്തിനായി ഉപയോ​ഗിക്കുന്ന ഇറച്ചി, ബ്രഡ്, ഖുബ്ബൂസ്, മയണൈസ് എന്നീ കാര്യങ്ങളിലും പ്രത്യേക ശ്രദ്ധ വേണമെന്ന് മാർ​ഗ നിർദേശത്തിൽ പറയുന്നു. ഉപയോ​ഗിക്കുന്ന ബ്രഡിലും ഖുബ്ബൂസിലും കാലാവധി രേഖപ്പെടുത്തുന്ന സ്റ്റിക്കറുകൾ ഉണ്ടാകണം. ചിക്കൻ 15 മിനിട്ടും ബീഫ് 30 മിനിട്ടും തുടർച്ചയായി വേവിക്കണം. അരിഞ്ഞെടുക്കുന്ന ഇറച്ചി വീണ്ടും വേവിച്ചെന്ന് ഉറപ്പാക്കുകയും വേണം. രണ്ടാമത് വേവിക്കുമ്പോൾ ബീഫ് 71 ഡിഗ്രി സെൽഷ്യസിൽ 15 സെക്കൻഡും കോഴിയിറച്ചി 74 ഡിഗ്രി സെൽ‌ഷ്യസിൽ 15 സെക്കൻഡും വേവിക്കണം. 

മയണൈസ് നിർമ്മിക്കുമ്പോൾ പാസ്റ്ററൈസ്ഡ് മുട്ട മാത്രമെ ഉപയോ​ഗിക്കാവൂ. പുറത്തെ താപനിലയിൽ മയണൈസ് രണ്ടു മണിക്കൂറിലധികം വെക്കാൻ പാടില്ല. ബാക്കിവരുന്ന മയണൈസ് നാല് ഡിഗ്രി സെല്‍ഷ്യസിൽ സൂക്ഷിക്കണം. രണ്ടു ദിവസത്തിനുശേഷം ഉപയോഗിക്കാൻ പാടില്ലെന്നും സർക്കാർ പുറപ്പെടുവിച്ച മാർ​ഗ നിർദേശത്തിൽ പറയുന്നു.