മിൻസയുടെ മരണം; സ്കൂൾ അടച്ചു പൂട്ടാൻ ഖത്തർ ഉന്നത വിദ്യഭ്യാസ മന്ത്രാലയം ഉത്തരവ്

ദോഹ: സ്കൂൾ ബസിൽ മലയാളി ബാലിക മരിച്ച സംഭവത്തിൽ ദോഹ അൽ വക്​റയിലെ സ്​പ്രിങ്​ ഫീൽഡ്​ കിൻഡർ ഗർട്ടൻ അടച്ചുപൂട്ടാൻ ഖത്തർ  ഉന്നത വിദ്യഭ്യാസ മന്ത്രാലയം ഉത്തരവ്​.[www.malabarflash.com]

സ്കൂൾ അധികൃതരിൽ നിന്നും ഗുരുതര വീഴ്ച കണ്ടെത്തിയതിനെ തുടർന്നാണ്​ നടപടി. ​ചൊവ്വാഴ്ച രാത്രിയോടെ വിദ്യഭ്യാസ മന്ത്രാലയം ട്വിറ്ററിലൂടെയാണ്​ തീരുമാനം അറിയിച്ചത്​.

ദോഹ സ്​പ്രിങ്​ ഫീൽഡ്​ കിൻഡർഗർട്ടൻ കെ.ജി ഒന്ന്​ വിദ്യാർഥിയായ മിൻസ മറിയം ജേക്കബ്​ ഞായറാഴ്ചയാണ്​ മരിച്ചത്​. ​

യാത്രക്കിടയിൽ ഉറങ്ങിപ്പോയ വിദ്യാർഥിനി ബസിനുള്ളിലുള്ളത്​ അറിയാതെ ഡ്രൈവർ ഡോർ അടച്ചു പോയതിനെ തുടർന്നായിരുന്നു ദാരുണമായ ദുരന്തം സംഭവിച്ചത്​. ഉച്ചയോടെ ബസ്​ എടുക്കാനെത്തിയ ജീവനക്കാരാണ്​ കുട്ടിയെ കണ്ടെത്തുന്നത്​. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

മിൻസയുടെ മൃതദേഹം ചൊവ്വാഴ്ച രാത്രിയോടെ ദോഹയിൽ നിന്നും നാട്ടിലേക്ക്​ കൊണ്ടുപോയി. രാവിലെ 8.30ഓടെ കൊച്ചി നെടുമ്പാശ്ശേരി വിമാനത്താവളത്തിലെത്തിയ ശേഷം കോട്ടയം ചിങ്ങവനത്തെ വീട്ടിലെത്തിക്കും.