ആദ്യം പെണ്ണുകാണാനെത്തിയ യുവാവുമായി ഉണ്ടായിരുന്ന സൌഹൃദം പ്രണയമായത് യുവതി വീട്ടുകാരെ അറിയിച്ചിരുന്നുവെങ്കിലും വീട്ടുകാര്‍ ബന്ധത്തിന് എതിരെ നിന്നതോടെയാണ് മറ്റൊരാളുമായി കതിര്‍ മണ്ഡപം വരെയുള്ള നാടകത്തിന് യുവതി തയ്യാറായത്. വീട്ടുകാരുടെ നിര്‍ബന്ധത്തിന് വഴങ്ങി തൃശ്ശൂര്‍ അന്നമനട സ്വദേശിയായ യുവാവുമായി വടക്കേക്കര പരുവത്തുരുത്ത് സ്വദേശിനിയുടെ വിവാഹമാണ് വ്യാഴാഴ്ച നടക്കേണ്ടിയിരുന്നത്. വധു തന്നെ വിവരം പറഞ്ഞതോടെ വരന് താലി ചാര്‍ത്തുന്നതില്‍ നിന്ന് പിന്മാറുകയായിരുന്നു. വീട്ടുകാരുടെ സമ്മര്‍ദ്ദത്തിന് വഴങ്ങിയാണ് വധു മണ്ഡപത്തിലെത്തിയതെന്ന് വരനും ബോധ്യമാവുകയായിരുന്നു.
വിവാഹം തടസപ്പെട്ടതോടെ ബന്ധുക്കള്‍ തമ്മില്‍ തര്‍ക്കമായി. ഒടുവില്‍ പോലീസ് എത്തിയാണ് സംഭവം രമ്യതയിലാക്കിയത്. വരന്‍റെ കുടുംബത്തിനുണ്ടായ ചെലവ് വധുവിന്‍റെ കുടുംബം നല്‍കാനും ധാരണയായി. എംകോം ബിരുദധാരിയായ യുവതിയുടെ വിവാഹം വെള്ളിയാഴ്ച പൊതുപ്രവര്‍ത്തകര്‍ യുവതിയുമായി ഇഷ്ടത്തിലായ യുവാവുമായി നടത്തി നല്‍കി.
0 Comments