ഹെൽമറ്റ് കൊണ്ടുള്ള യുവാവിന്റെ അടിയേറ്റ് ചികിത്സയിലായിരുന്ന ഭാര്യാപിതാവ് മരിച്ചു

ചെങ്ങന്നൂർ: യുവാവ് ഹെല്‍മറ്റ്​ കൊണ്ട് അടിച്ചതിനെ തുടർന്ന് ചികിത്സയിലിരുന്ന ഭാര്യാപിതാവ്​ മരിച്ചു. ആലാ തെക്ക് മായാഭവനിൽ സന്തോഷ്​ (49) ആണ് മരിച്ചത്. സംഭവവുമായി ബന്ധപ്പെട്ട് സന്തോഷിന്‍റെ മകളുടെ ഭർത്താവ്​ പെണ്ണുക്കര വടക്കുമുറിയിൽ പറയകോട് വീട്ടിൽ കലേഷ് ശശി എന്ന സുബിൻ (21) റിമാൻഡിലായി.[www.malabarflash.com]

തിരുവോണദിവസം വൈകിട്ട് 6.30ന്​ നെടുവരംകോട് ഭാഗത്ത് റോഡിൽ നിൽക്കുകയായിരുന്ന സന്തോഷിനെ കലേഷ്​ ശശി ഹെൽമറ്റ്​ കൊണ്ട്​ തലയ്ക്ക് അടിക്കുകയായിരുന്നു. ഗുരുതര പരിക്കേറ്റ സന്തോഷിനെ കല്ലിശ്ശേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും വ്യാഴാഴ്ച രാവിലെ 11ഓടെ മരിച്ചു. സന്തോഷിന്‍റെ ഏക മകൾ മഞ്​ജുവിനെ ഒരു വർഷം മുമ്പാണ് കലേഷ് വിവാഹം കഴിച്ചത്. പ്രസവത്തിന്​ വീട്ടിലെത്തിയ ഭാര്യയെ കാണാനെത്തുന്ന കലേഷ് മദ്യപിച്ച് സന്തോഷുമായി വഴക്കുണ്ടാക്കുക പതിവായിരുന്നുവെന്ന് പോലീസ് പറഞ്ഞു

സംഭവസ്ഥലത്തുനിന്ന്​ കടന്നുകളഞ്ഞ പ്രതിയെ ചെങ്ങന്നൂർ ഡിവൈ എസ് പി ബിനുകുമാറിന്‍റെ നിർദേശാനുസരണം ചെങ്ങന്നൂർ ഇൻസ്പെക്ടർ എ സി വിപിൻ, സബ്​ ഇൻസ്പെക്ടർ വി എസ് ശ്രീജിത്ത്, സീനിയർ സിവിൽ പൊലീസ് ഓഫീസർ സിൻകുമാർ, സിവിൽ പോലീസ് ഓഫിസർമാരായ അനീസ്, കണ്ണൻ, ജുബിൻ, മനോജ് എന്നിവരടങ്ങിയ സംഘമാണ് പൂമല ഭാഗത്തുനിന്ന്​ പ്രതിയെ കസ്റ്റഡിയിലെടുത്തത്. സന്തോഷിന്‍റെ ഭാര്യ ശ്രീദേവി.