ഹെയർ സ്ട്രെയ്റ്റനിങ് ചെയ്തതിനു പിന്നാലെ വൃക്കരോ​ഗം, കെമിക്കലാണ് കാരണമെന്ന് ഡോക്ടർമാർ

സൗന്ദര്യവർധക വസ്തുക്കളിൽ പലതിലും അടങ്ങിയിട്ടുള്ള ഘടകങ്ങൾ വൃക്കരോ​ഗങ്ങൾക്ക് കാരണമാകുന്നതിനേക്കുറിച്ച് അടുത്തിടെ പല റിപ്പോർട്ടുകളും പുറത്തുവന്നിരുന്നു. ഇപ്പോഴിതാ ഹെയർ സ്ട്രെയ്റ്റനിങ് ചെയ്ത ഇരുപത്തിയാറുകാരിക്കുണ്ടായ ദുരനുഭവമാണ് പുറത്തുവന്നിരിക്കുന്നത്. സലൂണിൽ ഹെയർ സ്ട്രെയ്റ്റനിങ്ങിനുശേഷമുണ്ടായ ആരോ​ഗ്യപ്രശ്നങ്ങൾക്കിടെ നടത്തിയ പരിശോധനയിൽ വൃക്കരോ​ഗം കണ്ടെത്തുകയായിരുന്നു. ടുണീഷ്യയിൽ നിന്നുള്ള യുവതിക്കാണ് ദുരനുഭവമുണ്ടായത്.[www.malabarflash.com]

മുമ്പ് ആരോ​ഗ്യപ്രശ്നങ്ങളൊന്നും ഉണ്ടായിട്ടില്ലാത്ത യുവതിക്കാണ് ഹെയർസ്ട്രെയ്റ്റനിങ് ആപത്തായത്. 2020 ജൂണിലാണ് യുവതി സലൂണിൽ ഹെയർ സ്ട്രെയ്റ്റൻ ചെയ്യാനെത്തിയത്. 20121 ഏപ്രിലിലും 2022 ജൂലൈയിലും ചെയ്തു. ഓരോതവണ ​ഹെയർ ട്രീറ്റ്മെന്റ് കഴിഞ്ഞുവരുമ്പോഴും ഛർദി, വയറിളക്കം, പനി, പുറംവേദന തുടങ്ങിയവ അനുഭവപ്പെട്ടിരുന്നുവെന്ന് പെൺകുട്ടി പിന്നീട് വ്യക്തമാക്കി. സ്ട്രെയ്റ്റൻ ചെയ്യുന്നതിനിടെ ശിരോചർമത്തിൽ നീറ്റൽ അനുഭവപ്പെട്ടിരുന്നുവെന്നും കഴിഞ്ഞതിനുശേഷം മുറിവുകൾ രൂപപ്പെട്ടിരുന്നുവെന്നും പെൺകുട്ടി പറഞ്ഞു.

ദി ന്യൂ ഇം​ഗ്ലണ്ട് ജേർണൽ ഓഫ് മെഡിസിനിലാണ് യുവതിക്കുണ്ടായ ആരോ​ഗ്യപ്രശ്നത്തേക്കുറിച്ച് ഫ്രാൻസിൽ നിന്നുള്ള ഒരുകൂട്ടം ഡോക്ടർമാർ പ്രസിദ്ധീകരിച്ചിരിക്കുന്നത്. തുടർപരിശോധനയിൽ യുവതിയുടെ രക്തത്തിൽ ക്രിയാറ്റിനിന്റെ അളവ് അധികരിച്ചതായി കണ്ടെത്തിയെന്നും അത് വൃക്കയുടെ തകരാറിന്റെ ലക്ഷണമായിരുന്നുവെന്നും ഡോക്ടർമാർ പറഞ്ഞു. മൂത്രത്തിൽ രക്തത്തിന്റെ അംശം കാണുകയും ചെയ്തിരുന്നു.

​ഗ്ലയോക്സിലിക് ആസിഡ് എന്ന കെമിക്കൽ അടങ്ങിയ സ്ട്രെയ്റ്റനിങ് ക്രീമാണ് യുവതിയിൽ ഉപയോ​ഗിച്ചിരുന്നത്. ഇതിനുപിന്നാലെ ​ഗ്ലയോക്സിലിക് ആസിഡും വൃക്കയുടെ തകരാറും സംബന്ധിച്ച ഡോക്ടർമാർ പഠനം നടത്തുകയും ചെയ്തു. എലികളിൽ നടത്തിയ പരീക്ഷണത്തിനൊടുവിൽ ​ഗ്ലയോക്സിലിക് ആസിഡ് ചർമത്തിലൂടെ വൃക്കയിൽ എത്തിയതാകാം പ്രശ്നമായതെന്ന് ഡോക്ടർമാർകണ്ടെത്തി. സലൂണിൽ നിന്ന് യുവതിയിൽ ഉപയോ​ഗിച്ച സ്ട്രെയ്റ്റനിങ് ക്രീം തന്നെയാണ് എലികളിൽ പരീക്ഷിച്ചത്. ഒപ്പം ഇതേ പ്രക്രിയ പെട്രോളിയം ജെല്ലി ഉപയോ​ഗിച്ച് മറ്റ് എലികളിലും പരീക്ഷിച്ചു. ശേഷമാണ് സ്ട്രെയ്റ്റനിങ് ക്രീം ഉപയോ​ഗിച്ച എലികളിലെ രക്തത്തിൽ ഇരുപത്തിയെട്ടു മണിക്കൂറിനുള്ളിൽ തന്നെ ക്രിയാറ്റിനിന്റെ അളവ് കൂടുതലായി കണ്ടെത്തിയത്. അതേസമയം പെട്രോളിയം ജെല്ലി ഉപയോ​ഗിച്ചവയിൽ അസാധാരണമായൊന്നും കണ്ടെത്തിയില്ല.

​ഗ്ലയോക്സിലിക് ആസിഡ് അടങ്ങിയ സൗന്ദര്യവർധക ഉത്പന്നങ്ങൾ ഉപയോ​ഗിക്കാതിരിക്കുന്നതും വിപണിയിൽ നിന്ന് ഒഴിവാക്കുകയും ചെയ്യുന്നതാണ് അഭികാമ്യമെന്നും ഡോക്ടർമാർ പറഞ്ഞു.

അടുത്തിടെ തൊലിവെളുക്കാനുള്ള വ്യാജക്രീമുകൾ ഉപയോ​ഗിച്ചതിനേത്തുടർന്ന് വൃക്കരോ​ഗമുണ്ടായ രണ്ടുപേരുടെ വാർത്ത റായ്​ഗഡിൽ നിന്നു പുറത്തുവന്നിരുന്നു. മെമ്പ്രനസ് നെഫ്രോപ്പതി എന്ന അപൂർവവൃക്കരോ​ഗം സ്ഥിരീകരിച്ച രണ്ടുപേരിലാണ് പരിശോധനകൾക്കൊടുവിൽ ഫെയർനസ് ക്രീമാണ് വില്ലനെന്നു തെളിഞ്ഞത്. മലപ്പുറത്തും സമാനമസംഭവത്തേത്തുടർന്ന് എട്ടുപേർക്ക് വൃക്കരോ​ഗം ബാധിച്ച വാർത്ത റിപ്പോർട്ട് ചെയ്തിരുന്നു.