സ്കൂൾ ​ടോയ്‍ലറ്റിൽ നാലും അഞ്ചും വയസ്സുള്ള കുട്ടികൾക്ക് ​നേരെ ​ലൈംഗികാതിക്രമം; ​പ്രതിയെ പോലീസ് വെടിവെച്ച് കൊന്നു

മുംബൈ: മഹാരാഷ്ട്രയിലെ ബദ്‍ലാപൂരിൽ സ്കൂൾ ടോയ്‍ലറ്റിൽ വെച്ച് നാലും അഞ്ചും വയസ്സുള്ള കുട്ടികൾക്ക് നേ​രെ ലൈംഗികാതിക്രമം നടത്തിയ കേസിലെ പ്രതിയെ പോലീസ് വെടിവെച്ചുകൊന്നു. അക്ഷയ് ഷി​ണ്ഡെ എന്നയാളാണ് കൊല്ലപ്പെട്ടത്.[www.malabarflash.com]

കേസിൽ അറസ്റ്റിലായ ഇയാളെ തലോജ ജയിലിൽനിന്ന് തെളിവെടുപ്പിനായി വാഹനത്തിൽ ബദ്‍ലാപൂരിലേക്ക് കൊണ്ടുപോകുന്നതിനിടെ തിങ്കളാഴ്ച ​വൈകീട്ട് 5.30ഓടെയാണ് സംഭവം.

പോലീസ് ഓഫിസർമാരിൽ ഒരാളുടെ തോക്ക് തട്ടിപ്പറിച്ച് പ്രതി വെടിയുതിർത്തപ്പോൾ തിരിച്ച് വെടിവെക്കുകയായിരുന്നെന്നാണ് ​പോലീസിന്റെ വിശദീകരണം. ഗുരുതര പരിക്കേറ്റ ഇയാൾ ആശുപത്രിയിൽ വെച്ചാണ് മരിച്ചത്. രണ്ട് പോലീസുകാർക്കും പരിക്കേറ്റിട്ടുണ്ട്.

സ്കൂളിൽ ശുചീകരണ തൊഴിലാളിയായിരുന്ന ഷിണ്ഡെ ലൈംഗികാതിക്രമം നടത്തിയതിന് ആഗസ്റ്റ് 17നാണ് അറസ്റ്റിലാകുന്നത്. അ​ന്വേഷണത്തിൽ പോലീസിന്റെ വീഴ്ച ചൂണ്ടിക്കാട്ടി നാട്ടുകാർ ട്രെയിൻ തടയൽ ഉൾപ്പടെയുള്ള പ്രതിഷേധത്തിനിറങ്ങുകയും ​പ്രതിപക്ഷ പാർട്ടികൾ സർക്കാറിനെതിരെ രൂക്ഷ വിമർശനവുമായി രംഗത്തെത്തുകയും ​ചെയ്ത​തോടെ കേസ് പ്രത്യേക അന്വേഷണ സംഘത്തിന് (എസ്.​ഐ.ടി) കൈമാറിയിരുന്നു.

സംഭവം ഉടൻ പോലീസിനെ അറിയിക്കുന്നതിൽ വീഴ്ച വരുത്തിയതിനാൽ സ്കൂൾ ചെയർമാനും സെക്രട്ടറിക്കുമെതിരെ പോക്സോ കേസ് ചുമത്തിയിരുന്നു. ഇരുവരും അറസ്റ്റിന് മുമ്പ് മുൻകൂർ ജാമ്യത്തിനായി ബോംബെ ഹൈകോടതി​യെ സമീപിച്ചിട്ടുണ്ട്.